“Түмэн айл көүл” ХХК-ийн охин компани болох “Түмэн айл энержи” ХХК-ийн Дорноговь аймгийн Мандах сумын нутагт хэрэгжүүлж буй "Мандах 100 МВт цахилгаан станц" төслийн Зураг төсөл гүйцэтгэгчээр БНХАУ-ын "Жунруй инженерийн зураг төслийн хүрээлэн" ХХК шалгаран, 2025 оны 12 сарын 25-ны өдөр "Цахилгаан станцын барилгын зураг төслийн ажил гүйцэтгэх гэрээ"-г амжилттай байгуулав. Тус гэрээг байгуулснаар Монгол Улсын төвийн бүсийн эрчим хүчний системийн үйлдвэрлэлийн дутагдлыг арилгах, говийн болон зүүн өмнөд бүсийн эрчим хүчний хангамжийг сайжруулах зорилго бүхий бидний төсөл амжилттай хэрэгжих томоохон алхмын эхлэл болж байна.

Зам тээврийн яамаас томилсон ажлын хэсэг 2025 оны 3-р сарын 19-20-ны өдрүүдэд “Монголын төмөр зам” ТӨХК-ийн Зүүнбаян – Тавантолгойн төмөр зам дахь Борхошуу зөрлөгт ажиллав. Ажлын хэсэг тус зөрлөгөөс салаалж шинээр барьсан 3798,76 метр дэлгэмэл урт бухий салбар төмөр замыг дохиолол төвлөрүүлэлтийн өргөтгөл, өөрчлөлт, ачилт буулгалтын талбай, өндөрлөсөн тавцан, вагон пүү, гэрэлтүүлэгийн барилгын ажлыг газар дээр нь шалгаж, Зам, тээврийн хөгжлийн сайдын 2020 оны А/154 дүгээр тушаалаар баталсан “Төмөр замын техник ашиглалтын журам”, MNS 5833:2010 “Төмөр замд барилга байгууламжийн ойртолтын болон хөдлөх бүрэлдэхүүний овор хэмжээ”, MNS 6229:2021 “1520 мм царигтай төмөр зам” зэрэг стандартын шаардлага хангасныг баталгаажуулж, байнгын ашиглалтад оруулах боломжтой гэж дүгнэлээ.

Түмэн айл көүл компанийн Дорноговь аймгийн Мандах суманд хэрэгжүүлж буй “Монголын төмөр зам” ТӨХК-ийн "Бор хошуу зөрлөг дэхь ачилт, буулгалтын терминал, гаалийн хяналтын бүс" төсөл амжилттай дууслаа. Таван толгой-Зүүн баян чиглэлийн 416.1 км төмөр замд холбогдсон хамгийн анхны салбар төмөр зам болсон бөгөөд туршилтын тээвэрлэлтийг амжилттай гүйцэтгэв.